.

.

الجمعة، 31 ديسمبر، 2010

حاجات حاوة كتير


الكام يوم اللي فاتوا انا اتعلمت حاجات كتير
1 -عرفت إزاي بتكون السعادة  لما تساعد حد ويفضل يدعيلك, لما تدي الوردة اللي كنت جيبها لنفسك لست عجوزة محتاجة وتبتسم لها اكبر ابتسامة ,لما تلقي بنت صغيرة في المترو وتسألها اسمها ايه ولما تعرف انه نفسها في عصير فتقولها طيب استني هطلع اعدي الشارع واجبلك عصير وهاجي استنيني وتطلع جري وتروح تجبلها العصير وترجع تديهولها.
2 -عرفت إزاي  ممكن تلعب في ماية المطر وتجري تحتها مع أني طول الوقت بعمل كده بس دايما بكون لوحدي مش بيبقي معايا صحابي ولا بتكون الماية برمل وطين وعرفت قد ايه انك تقعد بجزمة وشارب ممبلولين حاجة مقرفة وان القعاد من غير جزمة في المدرسة حاجة مريحة.
3 -عرفت إزاي حاجات صغيرة كتير ممكن تخليك من السعادة تطير.
4-عرفت إزاي اختار ألوان الدهان معاهم اصل احنا دهنا مدخل بتنا.
5 -عرفت إزاي تقدر تمشي في الشارع وتضحك بصوت عالي طول الطريق من قلبك ومن غير سبب.
6-عرفت إزاي تهرب من المدرسين وتستخبا منهم و إزاي ممكن تزوغ من حصص الفاضية كمان وعرفت إزاي ممكن ادخل اي فصل اقولهم "ممكن اقعد  عندكم شوية".
7- عرفت قد إيه الصحاب دول حاجات حلوة.
8-عرفت إزاي ممكن تعدي شارع الهرم جري وانت مسخسخ من الضحك وبتحاول تفضل عيونك مغمضة .
9-عرفت إزاي ممكن حاجات تبسطك علشان انت عاوز تبسط ونفس الحاجات تدايقك علشان انت عاوز تدايق.
-10 عرفت إزاي ممكن تكتئب مع ان كل حاجه حوليك حلوة وعرفت إزاي بيكون انفجار الكلمات جواك لدرجة تبقي مش ملاحق تكتب ايه ولا ايه.
11 -عرفت إزاي ممكن اطلع السلالم تاني بالمشقلب لكن في مصر وإزاي ممكن عيون الناس تقولك انك اكيد اتجننت .
12 -عرفت إزاي ممكن نفس الاغنية لام كلثوم يخليك  مرة تضحك ومرة تعيط.
13 -عرفت قد إيه كانت فكرة مش حلوة لما قررت اكتب مين اللي انا متاكدة انه هيعيط عليا لما اموت بعد الشر عني.
14 -عرفت إزاي ممكن تدخل الامتحان وأنت مش عارف حاجة ف اي حاجة.
15 -عرفت قد ايه حاجة حلوة انك تقول لحد ايه أنت بتحبه وقد ايه حاجة احلي لما تحققله احلامه وبعدان تلقي علي وشه اكبر ابتسامة لدرجة انك ممكن تشوف طقم سنانه كله.
16-عرفت إزاي ممكن اطلع المسمار بالكماشة مش بالمفك.
17-عرفت إزاي بتكون سقعان ولابس صيفي واقعد فوق الشباك والهوا من قوته بيطير شعرك وبرضوا متنزلش تجيب الجاكيت مع انه جنبك.
 18-عرفت إزاي ممكن اقنع نفسي اني عندي قوة خارقة وإني بسمع افكار الناس.
19 -عرفت إزاي ارجع اتخيل تاني بعد ما بقتش اعرف وازاي اقدر اتحكم في احلامي.
20- عرفت إزاي ممكن يكون حد بيحبك و أنت بتحبه وهو مش بيسأل عليك ومع ذلك أنت بتدعيله كل يوم قبل ما تنام.

هناك 10 تعليقات:

  1. Gamdaaaaaaaaaaaaaaaaaaaaa To7faaaaaaaa ya Rony Begad ana Tol EL Post 3amala afteker we enty bete7kelna el Kalam da we ad eh Kona mazholen we bened7ak we msh mesada2en elly beyet7eky 2odamna Begad ya3ny Enty 5aragteny Men Mood el we7esh elly Kont Fe Rabna Yekremek Ya Mobtasema Da2eman we tefdaly Mobtasema 3ala Toooooooool :):)

    ردحذف
  2. رضوي :
    ههههههههههههههه صباح الضحك بجد بس بجد انا مبسوطة انك خرجتي من المود ده ربنا معاكي في الامتحانات

    ردحذف
  3. البوست ده جميييييييييييييل جدا انتي مش متخيله عاجبني ازاااي .. روعه مشاء الله يا حببتي استمري كتابتك بقت احلي من كتب كتير قرتها :D

    ردحذف
  4. بجد يا رنيم انتى تحفه وتركيبه غريبه اوووووووووى تحسى ان فيها حاجات كتير طيبه,جدعنه,جنووووووووووووووووون بس حلوه اوووووووووى انا اصلا مش عارفه اقول ايه بس كل اللى اقولو انك خليتى طقم سنانى يقع من كتر الحاجات اللى عملتيها

    ردحذف
  5. مش عارف أعلق

    فيه حاجات حلوة كتير انتي كاتباها

    وحاجات تانية انتي كاتباها غلط

    بصراحة مش عارف أقول إيه ولا إيه ...

    ردحذف
  6. لحياة خبرات.
    بس بلاش تعدية الشارع مغمضة!

    ردحذف
  7. جميلة قوى ولمستنى قوووووووووووووووووى

    بالذات أنى بجد بجرب الحاجات دى :)

    ردحذف
  8. محمود : قول كل اللي ف نفسك

    ردحذف
  9. معتز : هههههههههه اصل انا من زمان هتجنن واعمل كده

    ردحذف
  10. شمعة : منورة والله مبسوطة اني مش لوحدي اللي بعمل كده كنت فكرة اني الوحيدة يعني

    ردحذف

لا تقسوا عليّ .. وابتسم للحياة : )))))