.

.

السبت، 20 ديسمبر 2014

ذكريات الطفوولة

أنا مش بفتكر كتير عني في الحضانة في المدرسة
عندي شوية حدوتات وشوية مشاهد ثابته : ) وشوية افكار غبية
* في الفصل عندي مشهد واحد باقي في الذاكرة لمدام نينت
وهي بتبري الاقلام الالوان بالبراية الحمراء اللي زي اللي عندنا في البيت لحد دلوقتي
*في الفسحة أنا مكنتش شخصية اجتماعية وكنت بفضل اتفرج علي الاطفال
وهما بيلعبوا استغماية لحد ما قررت أن اشاركهم واقولهم علي اماكن الناس اللي بتستخبا
غالبا بمنتهي الشر وغالبا كنت بستمتع
(كنت بسلم الاطفال تسليم اهالي ) : )))))
* عندي مشهد وأنا بتصور صورة المدرسة وشعري مقسوم من الجمب : )
*وعارفة أني كنت بغير من مريم واحنا في الحضانة 
علشان كانت بتلبس فستان الباليه اصفر مش زينا موف
*وأني وأنا راكبة اتوبيس المدرسة الصبح كنت مقتنعة أني اقدر
احب اي حد في العالم حتي اطفال الشوارع
*وكان دايما بيبقي نفسي في مريلة فوق الركبة وكان عندي اعتقاد
أن ماما مكنتش بتوافق تشتريهالي
وطلع السبب أني كالعادة ايدي طويلة وبحتاج اجيب مرايلة
مقاس اكبر علشان تبقي الكمام علي قدي
*أنا عارفة اني كنت متشردة وكنت بقطع الكولنات بتاعتي كلها
علشان بقعد علي ركبتي في الارض في الحضانة
وغالبا بلعب في الطين
أنا كنت مختلفة عن آلاء وهندا
بشعرهم الدهبي وجوههم البريئة
وملابسهم النظيفة دائما
يمكن عندي ذكريات تشرد اكتر في ابتدائي
ومرحلة العدونية وتسلق الحوائط
واللعب في الجنينة مع سمية وسارة
واللعب العجلة في الشارع
ومرسي مطروح : )
واصدقائي الصغار
مورا ولينا ويارا ورهف : )
وحب البحر
والقضاء الكثير من الوقت مع بابا
ويوم الصيف اللي كنت مع سمية وسارة وعمرو
وكنا نفسنا في مطر وكلمت بابا قولتله
يرش علينا ماية اكننا زرع : ) وبابا وافق
وفضلنا تحت نصوت ونضحك واتغرقنا ماية
ولما كنا بنعمل نفسنا علماء
ونفضل نقطف ورق شجر ونفحصه 
ولما كنا بنعمل نفسنا مدرسين
ونفضل نكتب جوابات لاهل العيال
ولما كنا بنلعب بالماية في الجنينة 
اللي ورا البيت وكنا بنستمتع
وأعقد ان في 2010 أنا وسمية ومريم
جربنا التجربة دي تاني وكنا ميتين ضحك
الساعة 6 الصبح او 7 
وطنط مني طلعت علشان تفتحلنا علشان كنا
مكسوفين نرن الجرس وكنا ميتين ضحك
أننا مبلولين وهنغرق لهم البيت
ولبست لبس من عندهم : )
ولما كنا بنلعب في البير السلم لعبة غبية
وبنفضل نصوت : )
ولما كنت ببات عند تقي واقعد اعيط
علشان مفتقدة ماما وخايفة اموت قبلما اشوفها
لكل الحاجات الحلوة اللي حصلتلي وأنا صغيرة
: ))) انا متتن هي طفولة مليئة بالعياط والتعذيب
ولكن أنا استمتعت وقطعت رقاب التشرد

ليست هناك تعليقات:

إرسال تعليق

لا تقسوا عليّ .. وابتسم للحياة : )))))