.

.

الأحد، 30 أغسطس، 2015

قواعد هذا الشهر

لا تحكم ولا تغتاب

أنا بقالي فترة مسيطرة عليا
فكرة أننا من اول ما بنتفتح عنينا الصبح
كل شيء بنمر عليه بنحكم عليه
مش بواجه مشكلة أنك تحكم علي اشياء 
بواجه مشكلة أنك تحكم علي اشخاص 
من النظرة الاولي
من المواقف الاولي
اللي غالباً بتؤدي لا محالة للغيبة
الغيبة مؤخراً بقيت من اكتر الاشياء اللي بتضايقني
وبتضايقني اكتر لما تبقي تافهه وسطحية
وبتغتاب فيها حد شوفته لاول مرة لمدة ثانية واحدة
بتغتابه وبتسخر منه لان حياتك فاضية زيادة 
ومفيش اي شيء شغلك غير الناس حوليك

أنا قضيت وقت طويل اووي 
بغضب حرفياً لو لقيت نفسي بعلق علي اي حد في دماغي
تعليقات ساخرة ليها علاقة بلبسهم او بشكلهم او بمدي غرابتهم
وأنا فاهمة كويس اوي يعني ايه حد يحكم عليك
مبقدرش اتخيل أن التعليق ده يطلع علي لسانك
انه بعد ما طلع عليت صوتك وأنت بتقوله
لدرجة أن الشخص ده سمعك وأنت بتضحك
قد ايه دي قلة ادب
وقد ايه أنت مينفعش تقعد مع حد بيحكم علي الناس
علشان مش حلوين زيادة علشان مش لبسين شيك زيه
علشان عاملين اي شيء عادي جداً او شيء غريب جداً
وبيدي لنفسه حق انه يسخر منهم او يتكلم عليهم وحش
مينفعش تقعد مع حد ويبقي اعز صديق ليك 
لو هو بيفكر او بيلفت انتباهه اي شيء الناس بيعملوه
مش علشان يدرسه او يفكر فيه او يوصل لاشياء منطقية
فقط علشان يسخر منهم حتي لو بينه وبين نفسه

وبدأت اتوصل لفكرة أننا كلنا عاوزين الاشيا نفسها
كلنا بنجري ناحية الاشيا نفسها
وبنعيط بالليل لنفس الاسباب
وأن لكل شخص له طريقه في التعبير
وكل شخص فاهم الحياة من وجهة نظره
هو راضي عن لبسه لو كان معاه فلوس كويسة يلبس اصلا
ده غير فكرة أنه ممكن ميكونش معاه فلوس
تخليه يكون في مستوي حضرتك علشان متسخرش منه
ممكن يكون معندوش الافكار اللي عندك
مش شايف نفس اللي أنت شايفه

انت لازم تدي الناس فرص أنها تلبس مختلف
ومن غير ما تحط للناس كلها 
معيارك وتلزمهم أنهم يوصلهولها
أنت ممكن تكره نوع لبس، تكره اشياء معينة
بس متصدرش احكام علي خلق الله
انهم فقرا، بيئة، شكلهم وحش

أنت لازم تدي فرص للناس 
تكتشف الاشياء لوحدها
وأنك تؤمن أن حرفياً محدش عينك
أنك نحكم علي الناس وتسخر منهم
اياً كان شكلهم ايه، لبسين ايه، مصاحبين مين
بيضحكوا ايه، بيفكروا في ايه
أنت مش هتصحبهم
فقط دعهم يمروا من امامك
بدون اي احكام

وتبدأ حرفياً تترفع عن اشياء ملهاش مليون لازمة
بتعملها أنت بتلقائية شديدة
وتفكر في اشيا اهم بكتير
وتبقي مش بتبص حتي علي الناس
معندكش ادني اهتمام أنك تسخر من اي شيء بيعملوه


ليست هناك تعليقات:

إرسال تعليق

لا تقسوا عليّ .. وابتسم للحياة : )))))