.

.

الاثنين، 5 أكتوبر، 2015

انا كشخص تافهه

انا لما بقلق من شيء
وده مؤخراً بيحصل كتير اوي
بفضل احاول اقلل من قيمة الشيء
وافضل احاول افكر 
ان فيه اشياء اسوء من كده بكتير ممكن تحصل
اننا ممكن ميبقاش عندنا بيت او اكل او صحاب او ماما 
وبفضل فترة طويلة بذكر كل النعم اللي انا سوبر ممتنة ليها
وبفضل افكر ان ها قد ايه مشاكل ولا حاجه
وحاجات صغننة 
واني المفروض اتكسف من نفسي
علشان بقلق علي حاجات تافهه
حتي لو هي سوبر كبيرة وسوبر مهمة دلوقتي
انا مبعرفش اسيطر علي القلق
او افكاري السلبية
اللي بظبط قبل من سنتين مكنش عندي منهم
انا ساعات لما ببقي مش كويسة
ببعد عن الناس اللي انا مش المفروض ابعد عنهم
علشان انا ببقي لابسة نضارة سودا
وكل شيء بيبقي اسود
نضارة سودا عارفة انها مش المفروض تبقي سودا
وأنها مش ذات ماتش سودا
وان الناس مهما بتحاول مش بتعرف تنجح 
بدرجات عالية ف انهم يخففوا القلق
المشكلة انك عارف ان فيه جانب مشرق
وعارف أنك شاطر
وعارف أن مفيش حاجه سووووبر وحشة هتحصل ان شاء الله
وبرغم كل ده انت مش بتعرف تسيطر علي اي شيء
لا افكارك ولا مشاعرك ولا خوفك ولا قلقك
أنا كنت فاكرة ان التذمر هو السبب
انا بقالي فترة مركزة اني مش اتذمر
ولحد اول امبارح انا كنت مستسلمة جداً
ومكنتش بفكر اتذمر
وبعدان النهاردة اكتشفت انه ملوش علاقة بالتذمر حتي
انا بس ببقي غالبا محتاجة 
حد بس يقولي ان الاشياء هتبقي كويسة
حتي لو انا عارفة انها هتبقي كويسة
وصحاب حلوين يروحوا معايا البيت من الكلية
انا ممتنة لصحابي
شكراً رنيما، سيهاما ، يو علشان انتم دايما حلوين
وانا بحبكم : )

هناك تعليق واحد:

  1. يا رون... في وقت معين بعد ما تقلقي كتييييير ..هتتعلمي ان خطة ربنا دايما هي المطمئنة واللي هتمشي غصب عنك، وهتكتشفي ايفنشلي انها الانسب، لما قلبك يمتص الحقيقة دي تماما زي السفنجة، هتبطلي تقلقي بنسبة كبيرة، وهتبطلي الأوفر ثينكينج، وهتؤمني ان كل حاجة بتكون كويسة، من غير ما تستني حد يعمل ده.
    ده جزء من النضوج أظن..مسيرك هتروحي هناك :)

    ردحذف

لا تقسوا عليّ .. وابتسم للحياة : )))))