.

.

الأربعاء، 25 نوفمبر 2015

you are rocking this teacher thing

أنا اعترف
انا بحب يوم الاربع
بحب اروح المدرسة المريبة
اللي مامتي كانت فيها وهي صغننة
وواقعة في حب شوية اطفال صغيرين
بس هما كبار جداً جداً
من الطف الاشياء اللي ممكن تحصلك
انك تكتشف قدرتك انك تخلي اطفال 
غرباء جداً ومتشردين جداً
يقعوا في حبك
ويتقبلوا عدم تقبلك للاشياء اللي متعودين عليها
برغم أن الاشياء الصغيرة
اللي انت بتعملها مش هتفرق معاهم
ولو فرقت معاهم هيجي حد في 3 ثواني يهدلك كل شيء 
الا ان أنا بحب اخليهم يجربوا حاجات جديدة
ويلعبوا بحاجات مختلفة
يسلفوا بعض حاجتهم ويرجعوها لبعض تاني
يحفظوا علي حاجتهم ويبطلوا يشتموا، يضربوا، يتخانقوا سوا
بغض النظر عن انهم بيشتموا وبيضربوا وبيتخانقوا مع كل الناس
كفاية انهم اقتنعوا انهم صحاب 
ل مجدي بعيونه اللي بتلمع
الولد اللي ببقي عاوزة اخده معايا البيت
كل يوم اربع 
الولد اللي عمره ما هيبقي شبه ولادي : )
للمي البنت اللي غالبا لو عندي بنت هتبقي شبهها بطريقة كبيرة
وللاطفال الحلوين 
الكتير اوي اوي
وكمية الحب اللي بديهلهم كل يوم اربع
لكمية الاحضان وكمية الطبطبة
انا ببقي شبه الاء 
انا بحب الاء علشان هي بتعرف تتعامل مع الاطفال
انا شبه مش بقفش ومش بزعق 
وبتقبل الاشياء كلها بصدر رحب
من غير نوتي تشير من غير ما اطرد اطفال من الفصل
من غير ضرب، شتيمة، تهزيق 
انك عارف انك مسيطر 
وانت كيوت ومش بتخرج عن شعورك : ))
لتقبلهم ان الميس بتاعتهم 
بترقص رقصات تحمس في الفصل 
بعد ما الدكتور بتاعتها بتقولها انها ممتازة
انهم بياخدوا بالهم من الباب
وبيفضلوا طول اليوم يقفلولي الباب
او ينزلولي النقاب علشان الباب مفتوح
انهم بيكونوا محترمين معايا
مقابل اني ابقي محترمة معاهم
للصغيرين اللي بيخافوا من الضرب
وللصغيرين اللي مش بيخافوا يقولوا الصدق
للصغيرين اللي بسبلهم مقلمتي مليانة الوان
من غير اي الوان ناقصة وسبحان الله كل مرة بترجعلي
للاطفال اللي مش بيعرفوا يعبروا عن الحب 
ولا بيعرفوا يعبروا عن اي شيء اصلا
بدون ادني اذواق او اراء مستقلة
وتقليد اعمي للاخرين
يوم الاربع يوم حلو
أنا بحبهم كلهم كلهم
وبحب احفزهم واقولهم انهم شطرين لما يبقوا شطرين
لفريق البازل اللي بيقطع رقاب
والولاد اللي بتلون حلو
والولاد اللي بتعرف تكتب اساميها كاملة 
الولاد اللي بتكلم وبتحكي
ولمحمد مسئول الفرشات في الفصل
الولد اللي لو اديتله اي شيء هيعمل منها فراشة
لاحمد شريف وشعره اللي لسه لحد النهاردة ملوش اسم
ومجدي اهم شخص في الفصل
وعمرو بطل البازل 
ليزيد ويوسف وحسن 
اكتر صحاب في الفصل
ليسين وبكمية الاستيكرز اللي بياخدوها
ولكل اللي مش بيضيعوا حاجتي 
وبيسمعوا الكلام 
ومش بيمانعوا يتأسفوا
او يستأذنوا 
للي بيخافوا علي حاجتي 
وبيرجعوها لي زي ما هي 
برغم تشردهم

الحمد الله 

ليست هناك تعليقات:

إرسال تعليق

لا تقسوا عليّ .. وابتسم للحياة : )))))