.

.

السبت، 25 مارس، 2017

اليوم ال 97 من السعادة

Spirit Bound (Vampire Academy, #5)Spirit Bound by Richelle Mead
My rating: 5 of 5 stars

انا فضلت فترة كبيرة جداً بحلم بالكتاب ده وكنت واثقة انه هيكون يستحق كل الانتظار
وكان يستحق جداً.. كان يستحق كل الساعات اللي قضتها وكل السهر وكل التعب.. بعترف انه مش الجزء المفضل عندي زي التالت او الرابع ولكن ولكن : )) انا حبيت الجزء ومش مصدقة انه خلص وانه فاضل جزء واحد بس.. انا ممكن احب اقرأ للابد عنهم ومش مصدقة ان الكاتبة خلصت السلسلة اصلا.. مش حاسة ان في شيء ممكن يحصل يخلي السلسلة تخلص.. كلنا متفقين انها بتكتب احسن من اي حد احنا قرأنا له قبل كده والحقيقة بعد خمس اجزاء مش حاسة ان ممكن اي شيء يحصل هي مش هتعرف تكمله او تخرج منه.. انا كنت واقعة في فكرة اني بحب احساس اني اقرأ شيء مش عارفاه ومش بعرف اتوقعه ومش بشوف اي احداث جاية ومش بقدر احدد الطريق اللي الكاتبة هتمشي فيه.. عادة لما بتبقي بتقرأ قصص اغلب الوقت وبتتفرج علي افلام كتير وبتكتب انت اصلا قصص بيبقي صعب اوي انك متقدرش تتوقع كل اللي هيحصل.. انا مكنتش بحاول حتي اتوقع وهنا بتظهر قد ايه هي كاتبة شاطرة..
انا وصلت في نص الكتاب لمرحلة اني اعتدت جداً الكتاب والقصص ولما بقيت بقفل الكتاب بحس ان الكتاب هو الواقع وحياتي هي مجرد فترات فارغة مش حقيقة ومش واقعية لحد ما افتح الكتاب تاني.. واعتدت جداً الشخصيات لدرجة اني كنت حاسة اني مش عندي ريفيو اكتبه.. الشخصيات كلها بتتصرف كما يجب.. وكل الاحداث بتحصل كما يجب.. مفيش شيء حصل كان غريب او مش مكتوب كويس مفيش شيء حصل يخليك تحس ان الكاتبة اختارت غلط
انا واقعة في حب الفكرة انها خططت لكل الاجزاء قبل ما تبدأ الجزء الاول فكانت عارفة هي بتعمل ايه بظبط .. اعتدت جداً اني اعيط وأنا بقرأ وبطلت اقف واسأل نفسي أنا بعيط ليه.. الحمد الله الكتاب مكنش له تأثير سلبي عليا زي الجزء التالت والرابع.. واعترف ان السلسلة كلها مأثرة عليا اكثر مما يجب
عمق القصة وعمق المشاعر وعمق الشخصيات كلها حاجات انا بخاف منها ومش بعملها في قصصي وبنبهر بسهولة جداً باي حد يقدر يخليني احس بحاجات انا عمري ما حسيت بيها قبل كده.. وده اكتر شيء الكتب الخمسة كانوا بيلعبوا عليه.. الطريقة اللي الكتاب بيوقعك في الحب.. والطريقة الي الناس بتحب بيها بعض.. الطريقة اللي الناس في الكتاب بيقروا بيها بعض.. وقد ايه هما عارفين بعض ومش محتاجين كلام علشان يفهموا كل شيء بيدور داخل الاخر.. وده مش ..بيحصل في العالم الواقعي مش بيحصل معايا ومش بعرف اعمله ومهما انت كنت عارف الشخصيات كويس جداً بيبقي صعب أنك تفهم هما حاسين ب ايه.. انا بحب ثقة الشخصيات في انهم عارفين بعض كويس جداً .. خصوصاً روز وديميتري وكنت مبسوطة ان روز فاهمة كل شيء ديميتري بيمر بيه.. كان هيبقي من القسوة انها بعد كل ده حتي ميبقاش ليه حق تفهم هو حاسس بايه.. انا بحب روز وبقدر ارليت بروز اغلب الوقت.. وبحب جداً ان مفيش اي شيء بيوقف في طريقها.. انا بحب تهورها وبحب الطريقة اللي هي بتدافع بيها عن نفسها وبحب ثقتها في نفسها ثقتها انها فاهمة كل اللي بيحصل وانها مش بتندم علي اي شيء بتقوله او بتحس انها ساذجة وبحب انها اغلب الوقت بتضحكني.. تجربة لطيفة جداً انك تقرأ كتاب اغلب الوقت البطلة فيه بتضحكك..
ومبسوطة بدميتري مبسوطة جداً ب ديميتري.. حتي لو كنت ببقي متعصبة وعاوزة احدف الكتاب.. حتي لو كنت ببقي متعصبة من ليز وحتي و كنت بحس انا ذات نفسي بالغيرة.. مش المفروض الكتب اللي بتكلم عن الفامبيرز تكون بهذا العمق وده شيء لسه بيبهرني..
انا مكنتش بحب ادرين بس انا بدأت احبه واتقبل وجوده واني هفضل مبسوطة حتي لو هو روز فضلوا سوا : ))
انا بس مش عجبني ان روز تبقي بتحب الاتنين وان انها تكون بتروح في كل الاتجاهات.. واعتقد انا في كل مرة هفضل ديميتري حتي لو بدأت احب ادرين وده اكتر شيء كنت حاسس انه غلط ومش المفروض يحصل او مش المفروض روز تعمل كده.. اعتقد بس انا عندي قدرة اني اتفهم مواقف الشخصيات دايماً بتقبلهم.. واعتقد انه ده ا ب روز عادي .. حصل قبل كده مع ميسون ومكنش فيه حد مضايق زي المرة دي.. انا بس متحمسة اعرف ايه اللي هيحصل
الكتاب كتير اوي انك تقدر لما تخلصه تكتب ريفيو واحد عن كل شيء حصل.. وانا كنت راضية عن اللي بيحصل ومكنتش بفكر اني هبقي محتاجة اكتب ريفيو عن شيء بهذا الجمال.. حبيت جداً بداية الكتاب والرسايل
انا بحب الحاجات الجديدة اللي بحس بيها وبحب الافكار والراسيل اللي بتوصلي
انا راضية عن الكتاب ومبسوطة جداً جداً جداً بيه
#عيون_من_قلوب


View all my reviews

ليست هناك تعليقات:

إرسال تعليق

لا تقسوا عليّ .. وابتسم للحياة : )))))