.

.

الأربعاء، 7 يونيو، 2017

ما قبل 2010

في 2011
كنت بقضي وقت كتير
وايام كتير
بعيط
كنت بطفي نور المكتب
وافتح الشباك علي الاخر
واقعد علي الشباك
اغني، اعيط او اكتب
ساعات كتير
كنت بحط مخدة اسند عليها ضهري
وبطانية اتغظي بيها
المعجزة اني عمري ما وقعت
والهوا كان بيبقي دايما حلو
ودايما مبهج
انا اول مرة افكر في كده
انا مكنش عندي مشاكل ساعتها
ومعنديش مشاكل دلوقتي
بس كنت بقع في دوامات طويلة من الحزن
من غير اسباب
وكنت بقضي ساعات بعيط مستمر
من غير سبب
كان في بقعة في الشارع
بظبط تحت عمود النور الوحيد
عند سور جنينة الميدان
كنت بتخيلك فيها
كنت بحب اتخيل انك في يوم هتيجي
وانا قاعدة في الشباك
هتلاقيني وتقف بظبط في البقعة دي
وترفع عينك وتبص لفوقك
وهتلاقيني في الشباك
عادة كنت بتخيل انك هتيجي بالليل
واني بمنتهي التلقائية
هجيب شنطة احط فيها حاجتي
وانزل اجري علي السلالم
لحد ما اوصلك
انا وانت تحت عمود النور
كنت بقضي وقت افكر في الحاجات
اللي انا هخدها معايا
واللي انا فكراه انها كانت حاجات تافهه
مكنش فيها هدوم
كان اغلبها حاجات انا عاوزة اوريهالك
او عملتهالك او عاوزة بس اتشاركها معك
صندوق كبير، البومات صوري وهكذا
اعتقد اني بقالي كام شهر
بالومك علي كل حاجه
بشيل كل حاجه وارميها عليك
بس في الحقيقة
انت لم تكن اي شيء
اكثر مما كنت عليه
ومش المفروض اشيلك مشاكل
كانت موجودة اصلا قبل ما تيجي
بس انا مكنتش ببقي مدركة
ومكنتش بحاول افسرها
يمكن كنت فاكرة ان ده طبيعي
انا مش بقيت عارفة ايه الطبيعي
مش عارفة اذا كان اللي انا فيه طبيعي
ولا فيه حاجه غلط فيا من زمان
دوامات الحزن دي لا تبدو طبيعية
وال ups and downs
والتقلبات المزاجية
والحفر اللي بوقع نفسي فيها
انا مش بكرهك
وبتمني انك تكون سعيد
قد ما بتمني اني اكون سعيد
وده بيخليني احسن حلو عن نفسي
احس احسن
واحس اني كل الحاجات اللي برميها عليك
مؤقته
واني هرجع اشيلها تاني لما اقدر اقف علي رجلي
او لما اروح اتعالج
انت بتبقي فاكر العلاج بيكون سهل
انك هتروح لحد
وفجاة هتحس كويس
اكنه مش therapist
اكنه ساحر
بس الدنيا مش بتمشي كده
بيبقي المفروض تبذل مجهود
وساعات بيلفت نظرك انك مش عاوز تتعالج
او بيحسيك انك مش عاوز تتعالج ومش عاوز تبدل مجهود
ودي حقيقة انا مش دايما ببقي قادرة ابذل مجهود
ساعات بيبقي اسهل انك تستسلم
وتأذي نفسك لحد ما طاقتك في التحمل تخلص
فتحاول انك تبذل مجهود
وتزق نفسك انك لازم تبقي كويس
وبعدان بتفضل كده
Ups and downs
واغلبها downs

ليست هناك تعليقات:

إرسال تعليق

لا تقسوا عليّ .. وابتسم للحياة : )))))