.

.

الخميس، 10 مايو 2018

being a strong independent woman


أنا عادة عمري ما بكتب عن الحاجات اللي الناس بتكتب عنها
ولا عمري بهتم بيها.. بس كبنت كنت محتاجة اكتب عن الموضوع ده
البنات كانوا فعلاً محتاجين حاجة مبالغ فيها جدا جدا
ابعد ما يكون عن اللي هما فيه 
علشان بس يبدأوا يبقوا اشخاص بالغة ومسئولة عن نفسها
مش طبيعي أن يكون دايما عندنا الفرصة أننا نهرب
أو منتحملش مسؤولية نفسنا، نرميها علي اشخاص تانية
ونختار الطرق السهلة والبسيطة اللي مفيهاش أي مخاطرة
نقعد نعيط لحد ما نحصل علي اللي احنا عاوزينه
أو نستني العرابة السحرية تيجي بسحرها
تحل لنا كل مشاكلنا 
بس علشان أحنا بنات.. 
أنا عمري ما كنت بتخيل أن كارتونز عامة
بيبقي ليها اي تأثير علي شخصياتنا
أو الطريقة اللي بنتعامل بيها مع المشاكل اللي بتواجهنا
بس مؤاخرًا حياتنا بقت عبارة عن فيلم سندرلا 
لازم فتي احلام ينقذنا منها.. لازم عرابة سحرية تساعدنا
ومينفعش ابداً نبقي إيجابيين ونقف علي رجلينا لوحدنا وببساطة نساعد نفسنا
كلنا بنستني المساعدة الخارجية من أي حد غير نفسنا
من اول بابا، ماما، صحابنا، فتيان الاحلام
لازم تبقي سلبي وتترمي علي السرير تعيط وبعدان حد يحللك مشاكلك بس علشان انت بنت 
أنا كمدرسة بحترم جدًا العياط.. جدًا جدًا جدًا على أنه وسيلة للتعبير عن المشاعر
بحب الاطفال يعبروا عن مشاعرهم أيًا كانت حتى لو بطريقة غير مناسبة للموقف تمامًا
لمجرد أنهم يدركوا مشاعرهم وأنا ادرك مشاعرهم أنا أيضًا
بس أحيانًا العياط بيكون وسلية أنهم يحصلوا على اللي هما عاوزينه أيًا كان هو إيه
وفي ارتباط شرطي بين العياط وبين أنهم يحصلوا علي اللي هما عاوزينه خلق من استجاب أهلهم لمطالبهم لما يعيطوا.. وده بيحصل في سن صغيرة عند الولاد وعند البنات بالتساوي  غالبًا بس بيدأ الاهل ميتقبلوش السلوك ده تمامًا من الولد بجملة "مفيش راجل بيعيط" ويشجعوا البنات أكتر علي السلوك ده فبيستمر معاهم حتى بعد ما يكبروا، يتجوزوا ويخلفوا.. بيبدأوا أحياناً بيستخدموه ك إبتزاز عاطفي
قابلت بنت  في المدرسة كبيرة مش صغيرة عندها مثلا 8 سنين بتعيط فقولتللها أنها محتاجة متعيطش وأن مفيش حاجة تتساهل وأن العياط مش هيغير حاجة ببساطة قالتلي أنا لما بعيط بيعملولي اللي أنا عاوزاه.. الجملة دي صعقتني علشان ببساطة هي بقت عارفة ازاي تحصل علي اللي هي عاوزاه بمجرد بس أنها تعيط.. 
محتاجين ناس تدرك مشاعرها وتكلم عنها وتحدد مشاكلها وببساطة تحلها حتى لو أحتاجت مساعدة من حد.. 
أنا بحترم جدًا الناس اللي عارفة هي عاوزة ايه.. هي اتجوزت وشايفة أن أنسب لها هي وزوجها أنها تقعد في البيت ومش تشتغل أو لما جالها بيبي قررت أنها عاوزة تتفرغ لتربية البيبي وده الصراحة شيء جميل جدًا ويستاهل التقدير
لكن اللي بيضايقني ببساطة أننا نكون صغيرين، مفيش أي حد في حياتنا ولا أي حد أحتمال يكون في حياتنا وبنقول "أنا عاوزة أتجوز وأقعد في البيت" السؤال هنا ليه أحنا عاوزين نتجوز ونقعد في البيت؟ ببساطة علشان هي خطة سهلة ومريحة وجميلة وتضمنها فتي احلام هيجي ينقذنا ويصرف علينا وياخد باله منا وأحنا في المقابل مش هنخاطر تماماً غير طبعا المخاطرة المعتادة أن فتي الأحلام يطلع قاتل متسلسل مش هتكلم عن اختيارتنا لفتيان الأحلام اللي بتبقي في اغلب الوقت مش مناسبة لينا تماماً
أنا بس سعيدة أن البنات بيحاولوا يعتمدوا علي نفسهم.. علشان مفيش حد هينقذك لا فتي احلام ولا والدان سحريان ولا عرابة سحرية ولا حتى أهلنا.. ولحد ما نتحط في الموقف مينفعش نختار حاجات بس علشان هي سهلة وعلشان عندنا مخرج وبقيت الخلق مش عندهم.. مش بحس أنه عدل أن الولاد يضطروا يعملوا كل شيء غصب عنهم وميعترضوش وأحنا أبسط الاشياء اللي هي أ ب مسؤولية وأ ب شخصيات بالغة مش بنعرف نعملها ومش بنعوز نعملها وبنهرب منها.
من وأنا صغيرة اهلي دايمًا بيشجعوني أعمل اللي أنا عاوزاه وأعتمد علي نفسي وأن مفيش مساعدات خارجية.. وبرغم ده أنا زي كل البنات.. يمكن مدركة ايه اللي بيحصل بس.
كنت امبارح بفكر أن البنات من وهي صغيرة مطلوب منها تغير أشياء كتير جدًا في نفسها على عكس الولاد..وفي الاخر بنستغرب ليه مش بنثق في نفسنا أو ليه مش بنشوف نفسنا أننا مش كويسين كفاية لأي شيء اطلاقاً.. دي نتيجة طبيعة لو أنا فضلت أقولك من وأنت صغير أنك علشان تبقي جميل محتاج تعمل قائمة من الأشياء الطويلة التي لا تنتهي.. بعد كده مش طبيعي انك تقضي بقيت عمرك بتتسائل اذا كنت جميل ولا في المزيد من الأشياء اللي المفروض تعملها علشان تبقي جميل كفاية لبقية البشر؟
   

ليست هناك تعليقات:

إرسال تعليق

لا تقسوا عليّ .. وابتسم للحياة : )))))