.

.

الأحد، 24 يونيو 2018

free listening

انا بقالي سنين
بحب اسمع الناس
ومحكمش عليهم او علي افعالهم
واديهم مساحة خالية من الاحكام
أنك تقدر تقولي أي شيء 
من غير ما انقدك او افكر عنك وحش
تقولي اي شيء وانت واثق أني هقف اسندك
وادعمك 
وده شيء بقي طبيعي جدًا بالنسبة لي ومعتاد 
أنا بحب أسمع الناس
وعمري ما بقولهم أي شيء مفيد
بس أميرة كانت بتقولي أنها بتحب 
أني مش ببقي عارفة المفروض اقول ايه
وبتحب محاولاتي أني اخفف عنها 
 لكن مؤاخراً أكتشفت انه بيبقي أصعب أنك 
تدعم الناس وتكون متسامح او متفق تماما
او عندك قبول لافعالهم او تقدر تشجعهم عليها
وهي بالنسبة لك غلط اوحرام
ولا تتفق نهائي مع الاشياء اللي بتؤمن بيها
وبقف دايمًا في نص الطريق مش عارفة اتصرف
هل المفروض اسمعهم واقبلهم واقبل افعالهم كما هي 
حتي لو غلط حتي لو حرام
ولا المفروض أني من حبي ليهم ابقي عاوزة احميهم من الاشياء
الغلط او ابعدهم عنها أو حتي افهم هما بيعملوها ليه واحاول ابعدهم 
خصوصًا لو هما عاوزين يبعدوا ومش عارفين
أو علي الاقل اقدر أتكلم في الموضوع من غير ما هما يحسوا أني بحكم عليهم
وبخاف اكون بنافق الناس
لما بختار دايماً الخيار الاول
أني مقولهومش حاجه
واني اتقبل افعالهم الغلط 
بغض النظر هما شايفنها غلط ولا لا
اتقبلهم واديهم نفس المساحة اللي كنت هديهالهم في العادي
بخاف انهم يفهموني غلط
انا مبادئ وقراراتي وحياتي
ملهومش علاقة بتقبلي لافعالك
او اني بحبك بالرغم من ايه اللي حصل
حتي لو بتأذي نفسك
اني هفضل احبك مهما حصل
بخاف أني لما اتعامل عادي
واتقبل الأمر تماما 
يفتكروا أن الأمر مقبول بالنسبة لي
كنت بفكر النهاردة أن ال free listening 
متعملش علشان أحنا افكارنا واحدة
متعملش علشان يكون سهل 
وأنه مش هيبقي في free listening 
لو أحنا مش مختلفين عن بعض
ولو أحنا مش بنغلط

أنا مش بوافق علي كل الاشياء
ومش بقدر أعمل كل الاشياء اللي عاوزاها
عندي حدود
ومش شيفاها حدود ومش عاوزة اتحرر منها
ومحتاجة الناس متحكمش عليا
زي ما أنا مش بحكم عليهم
بحتاجهم يتقبلوني
ويفهموا أننا مختلفين جدًا
بس عارفين نسمع بعض 
عارفين نحب بعض من غير ما نكون نسخ من بعض




ليست هناك تعليقات:

إرسال تعليق

لا تقسوا عليّ .. وابتسم للحياة : )))))