.

.

الخميس، 12 يوليو 2018

I thought I knew what love was til I met you

أنا بحلم أقدر أساعد الناس
 تحب البشر كلهم
تقدر تعبر عن مشاعرها
زي ما هي
من غير خوف او قلق

أنا دايماً بحس
ان في نوعين من الحب
انك تحب اشخاص وبشر زي اهلك واصحابك
وانك تقع في حب شخص
نوع أنا بحس أني شاطرة فيه جداً
ونوع بحس أنه غريب ومخيف وغير مألوف
وغالباً بيطلع اسوء ما فيا وده شيء مريب جداً  لو فكرنا فيه

 هل في نوعين من الحب فعلاً
ولا ده شيء في خيالنا
أنك تبقي مستني شيء مختلف جداً
وبخاف يطلع مفيش انواع من الحب
وميطلعش مفيش شيء مختلف
وأن ده أكتر حاجة هتحس بيها من الحب
أو أن ده كل الحب اللي ممكن تحس بيه في قلبك

ولو في فرق بس أنت حبك اصلا مختلف
أنت بتقع في حب الأشخاص العادين
وبتحبهم حب مختلف

أنا عاوزة أتعلم أحب الناس
أحبهم زي ما هما عاوزين

من فترة كنت واقعة في مشكلة
أني مش بعرف أقول ايه للناس
لما يحكولي حاجات
لما مش ببقي عاوزة اقولهم حلول
وبخاف ادور علي الجانب المشرق
وميكونش ده اللي هما عاوزين يشوفوه
ومشاعري أتجاه حكايتهم دايماً
بحس أنها سطحية وأنها مش كفاية
واتعلمت أني أقول الحقيقة
واقول مشاعري زي ما هي
اتعلمت مزنقش حد يحكي
ومزنقش حد يتكلم
وأني أحب الناس حتي لو انا مش عارفة عنهم حاجة
أني اطبطب عليهم
واحضنهم ومفلتهمش ابداً
أني أحاول أخلهم يحسوا أحسن
يحسوا أنهم محبوببين وأني هفضل موجودة علشانهم
أنا كنت طفل أكتشف فجأة
أنه مبيعرفش يحب
مبيعرفش يتعامل مع البشر
وأنا في طفولتي مكنتش ابداً كده
دايما الامور كانت سهلة بالنسبة لي
وبحب أعبر عن مشاعري
ومش بخاف او اقلق
بس أنا هحب أتعلم ازاي اقع في الحب
وازاي اكون كفاية
وازاي ابذل مجهود ووقت وحب
وده شيء جميل جداً

أنا بخاف أحب الناس والناس متبادلنيش نفس الحب
نفس مقدار الحب
بس في الطريق أكتشفت أن مفيش حاجة فيا
تخلي الناس متبادلنيش الحب
أكتشفت أن التعلق صعب ومتعب للطرفين
أنا لسة بتعلق بالناس
وبوصف نفس أني كائن طفيلي جداً
بس أنا أتعلمت أبعد وادي مساحات ومسافات
اتعلمت أقرب بس لوقت قليل
أقرب واللي حواليا مقدرين وجودي
أنا دايما بحاول أكون لطيفة مع الناس
اللي بحبهم أو هحبهم يحبوني
بشجع الناس واسندهم وادفعهم دفع لتحقيق احلامهم

عندي مشكلة لسة أني اتواجد للناس اللي بحبهم
وده شيء اكتشفته مؤاخراً
أن لغة الحب بتاعتي وقت وتقدير
بحب الناس تقضي معايا وقت (quality time)
بحب الناس تقدرني وتشكر فيا وتقولي كلام حلو جداً
بس أكتشفت أن الحب اللي بديه للناس مش نفس الحب اللي أنا بحتاجه
لغات الحب خمسة: التقدير، الخدمة، الوقت، اللمس، الهدايا
وأنا بقدر أحب أو أدي تقدير، لمس وهدايا
والخدمة والوقت أصعب لغتين حب عندي
ودول اكتر لغتين بحسهم فارقين معايا أني مش بقدر أديهم

أنا دايما بحس أني مبعرفش أحب
وده حقيقي أنا بحس كدده دايماً
بس في يوم وقفت ولقيت
أني مش عاوزة أكون مبعرفش أحب
مش عاوز اكون الشخص اللي بيتعلق في الناس
ومش بيديهم أي شيء نهائي
أنا بحب أحب ونفسي أعرف أحب
وأقدر أخلي الناس تحب الناس وتحبلهم الخير
البوست ده تماماً تماماً عن الحب
لقيت أن أبسط خطة وأسهل حل
أني أقدر أدي الناس الحب ب ال 5 لغات
لحد ما اقدر أخلي حبي أعمق للناس وله معني وثقل
وبيكفيهم

ولغتين الحب اللي مش بقدر أديهم
بيحسسوني وحش عن نفسي
وناوي لبقية السنة أحاول مع نفسي
(الخدمة والوقت)
الكلية خلتني شوية مش عندي وقت
متعودة ميكونش عندي وقت
حتي لو أنا عندي وقت
مش بحاول أقرب ومش دايما ببق عاوزة اقضي وقت مع الناس
ساعات ببقي عاوزة مردش علي موبيلي
ومردش علي الرسايل 
واقعد لوحدي جداً جداً
والخدمة
أنا بكسل أعمل اي شيء 
ودايما أنا الشخص الكسول اللي بيكسل صحابه
ومش بيحب يخرج من البيت
ودول حاجتين هحب غيرهم في نفسي

بحب لما بنبقي ماشين الطريق 
ونبدأ نبص علي نفسنا
ونغير أشياء 
وده كان بطل يحصلي من وقت طويل

أنا دايما لما بقع في الحب
ببقي عارفة أنا بقع ليه
ببقي عارفة الاشياء اللي بتجذبني واللي بتوقعني
ببساطة

والنهاردة يومي بدأ وأنا بكتب عن الحب
واستمر اليوم كله بيدور حول الحب
حول الاشياء المميزة والمختلفة اللي ممكن تلاقيها
عن العلاقات الانسانية وعن مدي تعقدها
أنا بحب لما أقدر أفهم مشاعر معقدة
ومحسش أني متخلفة عقلياً
ومش بفهم في المشاعر
أنا بحب المشاعر 
بحب المحادثات العميقة 
والمشاعر المعقدة 
بحب أفهمها وبحب أقدرها
أحيانا ردود فعلي بتكون غير مناسبة للموقف
بس فكرة أني قادرة افهم اشياء معقدة
دايما بتبهرني 
الحب بيبهرني
والناس اللي بتقع في الحب 

وومتنة للناس اللي مش بتكلم كلام ممل
اللي بتحكي قلبها ومش بتخبي
وبتخلي أيامنا مختلفة 

شكراً للحب 

ليست هناك تعليقات:

إرسال تعليق

لا تقسوا عليّ .. وابتسم للحياة : )))))